آسان کام

سب سے آسان کام تو یہ ہے کہ اپنے سامنے پھیلی ہوئی برائیوں،  تلخیوں اور حقیقتوں سے نظریں چرا کر ایک فرضی داستاں کا ایک فرضی کردار بن کر رہا جائے جس کے نہ تو ہونے سے کچھ فرق پڑا تھا اور نہ ہی چلے جانے سے کچھ فرق پڑے گا . اس کے علاوہ ایک اور آسان کام یہ بھی ہے کہ اپنی  ذات اور انا کی پوجا کی جائے،  اس کا دفاع کیا جائے اور اسی طلسماتی محل میں خود کو قید کر لیا جائے. 

یہ سب کام آسان اور نفس کے طابع ہیں، ان کو کرنے کے نتیجے میں آپ شاید کچھ وقت کے لیے اپنے لیے راحت کا سامان پیدا کرنے میں کامیاب ہو جائیں مگر سکون قلب کا حصول اس سے کبھی بھی ممکن نہ ہو پائے گا. 

ایک مخصوص دائرہ کار کے اندر یہ دنیا تسلیم اور اقرار کا دوسرا نام ہے، اپنے سانچے سے نکل کر کسی دوسرے سانچے میں ڈھلنے کا نام ہے. جہاں قدم قدم پر ایک مختلف صورت حال ہماری منتظر ہوتی ہے، ایک نئے زاویے اور انداز کا امتحان ہماری راہ تک رہا ہوتا ہے.دراصل ہوتا یہ ہے کہ ایک جانب انسان یہ دیکھ اور سوچ رہا ہوتا ہے کہ اس کے لیے کیا بہتر ہے اور دوسری جانب الله تعالی انسان کے لیے کچھ نہ کچھ طے کر چکا ہوتا ہے اور یہی اس کی قسمت میں لکھا جا چکا ہوتا ہے.

جو لکھا جا چکا وہ مٹنے سے رہا اور جو ہو چکا اسے واپس لانا ناممکن ہو چکا، تو اب منظر مزید واضح اور صاف ہو گیا ہے. کرنے کا کام یہ ہے کہ الله کا بندہ بن کر میدان میں اترا جائے، جو ہو، اسکا سامنا کیا جائے،  اپنے لیے وہی کچھ پسند کیا جائے جو الله نے آپکے لئے پسند کر رکھا ہے وہی کیا جاۓ جو آپکے لیے طے کیا جا چکا ہے،  وہی سنا جائے جو آپ کو سننا چاہیے اور  وہی کہا جائے جس کے کہنے میں  خالق کی مرضی داخل ہے.  ہاں ایسا بھی ہو سکتا ہے کہ کسی اور انسان کی مرضی اس مرضی میں شامل ہوجائے جو الله کی مرضی ہے تو اس صورت میں آپ کے لیے قابل قبول وہی ہے جو الله کی مرضی ہے  کیونکہ الله کی مصلحت یہی ہے اور وہ جو چاہتا ہے اس کا اندازہ لگانا بھی ہمارے وہم و گمان سے باہر ہے  لیکن شاید وہ بھی  دنیا میں توازن برقرار رکھنا چاہتا ہے.

اچھوں میں اچھائی کی کیا قدر اور بروں میں برائی کی کیا اہمیت،  اسلیے اندھیرے میں روشنی اور کفر میں ایمان کے لیے وقف شدہ شمع کو مسلسل جلنا پڑتا ہے،  لمحہ بہ لمحہ پگھلنا پڑتا ہے اور جلتے جلتے اس سایہ کو بھی ختم کرنا پڑتا ہے جو اس کے وجود کے باعث پیدا ہوا تھا. 

اس کا اختتام ایک روشن صبح ہے کیونکہ

 "یہ میرے رب کی مرضی ہے"

اور یہی شب ظلمت میں استقامت کی سب سے بڑی اور کارگر دلیل ہے.

ملک انس اعوان

http://hddesktopwallpapers.in/rain-fall-wallpaper-candle/