سر شام شکست

ابھی کل ہی کی تو ہے بات
میں سر شام چپ سا ہو گیا تھا
سامنے پیڑ قطار اندر قطار
ایک دوسرے سے لپٹے ہوئے
ایک دوجے پہ بوجھ ڈالے ہوئے
جیسے گزرتے وقت کے نوحے پڑھ رہے ہوں
سیاہی چھانے لگی تھی
افق پہ ڈوبتے سورج کی جاں
کہ جیسے نیزے کی نوک پہ آ ٹکی تھی 
پنچھیوں کے شور سے دل ڈوب رہا تھا
عجب اک آزمائش تھی
سایہ دل میں دھوپ بھری تھی
خامشی تھی ساتھ میں تو بھی کھڑا تھا
اجنبیت لہجے میں کیوں آ جمی تھی
راستے تھے، مگر میرے نہیں تھے
ہمنشیں تھے، میرے نہیں تھے
سبھی کچھ داؤ پہ جو آ لگا تھا
اگر میں بولتا
بولتا بھی تو کیسے
میں تو جود سے لڑ کر گرا تھا
میں اپنے آپ سے تھک کر گرا تھا

ملک انس اعوان

مکمل تحریر >>>

پتہ بتا رہا ہے

مجھے یقیں ہے کہ اب کی بار بارش میں
دور کہیں کلیاں بھی کھلتی جاتی ہیں
رنگ زمیں کا پتہ بتا رہا ہے
کہاں کہاں سے سبزہ کشید ہونا ہے
شاید تم  مجھے سن رہے ہو
یہ بھی اک پہلوئے زندگی ہے دوست

ملک انس اعوان

مکمل تحریر >>>

گرداب

بانہیں دھر کہ آہنی جنگلے کے سینے پہ 

میں پانی کے دائروں سے بات کرتا ہوں

ادھر اُدھر پھوٹتے ہوئے  گرداب 

لمحہ لمحہ حجاب کرتے ہوئے 

لہر در لہر ابھرتے ہیں 

ڈوب جاتے ہیں 

جیسے کوئی نیا شاعر 

بانہوں میں غزل بھرتے ہوئے

ملک انس اعوان 

20 اگست 2016 

خانپور نہر

مکمل تحریر >>>

اکتاہٹ

معلوم ہے مجھکو دروازہ میرا اور نہیں بس دستک ہوگی
اس کا لہجہ اسکی جلدی اور بہت اکتاہٹ ہوگی
ہوگی ساری دنیا داری اسکے لیے یہ ساز تو ہوگی
جو دنیا کا اہل نہیں ہے اسکو تو گھبراہٹ ہوگی

ملک انس اعوان

مکمل تحریر >>>

مانتا ہوں..

ہاں مانتا ہوں کہ یہ پہاڑ یہ جھرنے یہ چشمے یہ بل کھاتی ندیاں، یہ سرگوشیاں کرتی ہوئی نرم سرد ہوا،  برف پوش کہسار بے انتہا خوبصورت ہیں. مگر یہ صرف خوبصورت ہی نہیں بلکہ عبرت کا نشان بھی ہیں،    صدیوں سے معمولی تبدیلیوں کے ساتھ یہ متواتر موسموں اور آفات کو جھیلتے ہوئے اب تک کسی نہ کسی حد تک اپنا وجود برقرار رکھنے میں کامیاب رہے ہیں، لیکن کچھ ایسا بھی ہے جس کے بدلنے کی رفتار ان سب سے زیادہ ہے، وہ ہیں ہم انسان،  ہم جیسے کئی  سینکڑوں بلکہ ہزاروں کی تعداد میں ان پہاڑوں پہ آئے سستائے، لطف اندوز ہوئے اور بالآخر مجبوراً یا عادتاً یہاں سے چلتے بنے یا لیجا ئے گئے. پھر اور کئی جو ہم سے کئی گنا بہتر نظر اور زہن رکھنے والے یہاں سے گزرے اور شہر ہنگامہ میں نایاب ہو گئے. اس قدر نایاب کہ ان جیسا ڈھونڈ کر لانا بھی ناممکن ہو گیا. انکے نایاب ترین خیالات صفحے یا کلام کی صورت میں ڈھلنے سے پہلے ہی زیر زمین غرق ہو گئے. مگر یہ سر سبز پہاڑ یہ وادیاں پھر بھی صفحہ زمین پہ موجود رہے. ان پہ آنے والے فنا کے راہیوں نے بقا کی نظر سے انکو دیکھ کر بقا کی چاہت کو دل میں بسایا ہے.مگر یہ بقا اور فنا کے سارے قصے میں  سمجھنے کی اہم بات یہی ہے کہ اگر ان کی ہی مانند مردہ خوبصورت اور برقرار نظر آنا مقصود ہے تو اس کے لیے زیادہ ضروری چیز بے حسی ہے بالکل انہی پہاڑوں کی مانند جن پر سے کئی لوگ گزرتے اور مرتے ہیں مگر یہ ہاتھ آگے بڑھا کر نہ تو روکتے ہیں اور نہ ہی مرنے کی کوشش کرنے والے کو اپنے دامن میں سنبھالتے ہیں. بلکہ بے حسی کی تصویر بن کر حیات انسانی کا تماشا دیکھتے ہیں. پتہ نہیں انسان انسے کیوں متا ثر ہوتے ہیں حلانکہ ایک انسان کے اندر کی خوبصورتی کی ایک چھوٹی سی رمق بھی ہر لحاظ سے اعلی اور بالا ہے. اور اگر کوئی انسان اس حد تک گرنا چاہے تو چاہتے ہوئے بھی گر نہیں سکتا، کیونکہ یہ ندیا اور دریا تو کمی یا زیادتی کے ساتھ بہتے رہیں گے مگر اس وقت میری طرح یا مجھ سے بہتر یا مجھسے بدتر لوگ یہاں آ آ کر اپنا کردار ادا کر کے قرطاس سے غائب ہوتے جائیں گے، ان کی جگہ نئے چہرے سبزہ زاروں کی زینت بن جائیں گے اور کسی کو خبر بھی نہ ہو گی. یہی افراد اور لوگ ہی تو قابل قدر اور قابل توجہ چیز ہے. ورنہ ان پہاڑوں کی قدر ہی کیا ہے..... قریباً نہ ہونے کے برابر..! 

ملک انس اعوان

کنہٹی گارڈن ، وادی سون ،خوشاب،پنجاب ،پاکستان

مکمل تحریر >>>