سالِ تسلیم گزر گیا

اب سے ٹھیک چند دن کیا بلکے گھنٹوں بعد دنیا میں رائج عیسوی کلنڈر اپنا آخری ہندسہ بدلے گا اور اس طرح دنیابھر میں سال 2017 کا آغاذ ہو جائے گا، کل ملا کر 366 دن جو 52 ہفتے اور 2 دن بنتے ہیں ماضی کے صفحات میں ضم کر دیے جائیں گے ۔سو اب  اگر بیٹھے بیٹھے اس سال کے اہم واقعات پہ نظر پڑے تو ہاتھ مسلنے کے سوا کوئی چارہ نہیں بچتا ، کیونکہ ہم بہر حال مخلوق ہیں ,تقدیر کے پابند ہیں ،ہمارا تخیل ہم سے بر عکس انتہائی آزاد ہے ۔ان دو انتہاؤں کے درمیان وقت جس تیزی سے انسان کو گھسیٹتا ہے یہ احساس رکھنے والے خوب جانتے ہیں ، جاننے کا یہ تجربہ بھی وقت کا پابند ہوتا ہے ،جوں جوں وقت کی سوئیاں زندگی کے مدار پہ چکر کاٹتی آگے بڑھتی جاتی ہیں ، چہرے ، منظر اور ان مناظر کے ترشے ہوئے خدوخال مزید واضح ہو تے چلے جاتے ہیں ، ایسا بہت کچھ جو لکھا ہوا کسی وقت میں  پڑھا جاتا  ہے درست ثابت ہوتا ہے اور اور کچھ ایسا بھی متن ہونا ہے جس کے مفہوم کو تجربات کی کسوٹی غلط ثابت کر دیتی ہے۔کچھ کو ہم  تسلیم کر لیتے ہیں اور کچھ حقیقتوں کو ذہن رد کر دیتا ہے ، مگر جب عقل کی نمی ضد میں نرمی لاتی ہے تو ذہن ان کو رفتہ رفتہ  تسلیم کرنے لگتا ہے ۔
یہ سال تسلیم کا سال رہا ،صبر اور مزید نرمی اختیار کرنے  کا سبق دے گیا۔ نقصانات اتنے کہ جنکا ازالہ ممکن نہیں مگر اللہ تعالی کے اتنے انعامات کہ جتنا بھی شکر ادا کیا جائے وہ کم ہے ۔ ایک اہم چیز جو کسی حد تک سیکھنے کو ملی وہ خود احتسابی رہی ، چاہے وہ معمولی نوعیت کی ہی ہو یا بڑھتی عمر کا ہی اثر ہو مگر بہرحال ایک حقیقی صورت میں اس سے شناسائی ممکن ہو پائی ہے ۔ خود سے دور کسی اور کی نظر سے خود کو دیکھنے کی صلاحیت حاصل کرنے کی کوشش جاری رہی ہے ، اور ہمارے لیے اس کی کوشش کرنا اس کے حاصل کرنے کے زیادہ اہم ہے ۔
اپنی کمیاں  کوتیاہیاں  غلطیاں بار بار سامنے آ  نے کے باوجود ان کے حل اور ان کی جانب رجوع کی اشد ضرورت محسوس ہو رہی ہے ۔مزاج کا ظاہری ٹھہراؤ اندرونی بے چینی سے میل نہ کھانے کے باعث  بے وجہ کی پرملال کیفیت سے دوچار رہا ہے ۔ ظاہر اور باطن میں مطابقت پیدا کرنے کی شدید ضرورت محسوس کی جارہی ہے ۔
اپنی زندگی کے بدرترین لوگوں کے درمیان سے گزرتے ہوئے الحمداللہ اس وقت کے بہترین  لوگوں کو اپنا منتظر پایا ہے ،ان کی موجودگی اور ان کا خلوص  میرے لیے سب سے بڑا اثاثہ ہے۔ انکو دینے کے لیے میرے پاس دعاؤں کے علاوہ کچھ بھی نہیں ہے۔ اللہ تعالی حیات کی تلخیوں اور غلطیوں  سے سبق سیکھنے ، مستقبل کو  سنوارنے اور تعمیرکرنے ، اپنے رستے میں قبول کرنے ، مثبت توقعات پہ پورا اترنے ، جوانی کو بہترین جگہ کھپانے ،سعادت کی زندگی اور شہادت کی موت کو اختیار کرنے کی توفیق عطا فرمائے ۔آمین

تحریر:
 ملک انس اعوان
30 دسمبر2016 ،
اٹک ،پنجاب ،پاکستان

مکمل تحریر >>>

باد صبا یاد رہے

یہاں سے دور

بہت دور 

وہاں کی بات ہے یہ 

جہاں پہ فاصلےدرحقیقت 

کچھ نہیں ہوتے 

زہن خاموش 

دل کی زباں ہوتی ہے 

اس گلستاں میں خزاں کا ڈر 

حشر سے بڑا ہوتا ہے 

اس قدر پاکیزہ کہ وہاں پر 

کوئی منظر نہیں ہوتا

ہو بھی تو  بن نہیں سکتا 

کہ نظر بھی حیا کرتی ہے

وہاں خدا کرے کہ  اک پھول

جس کی پیاس سدا  

شبنمی قطروں  سے بجھے 

رنگ  جس کے نہ پھیکے پڑیں 

اسکی ڈالی پہ روز رنگ نئے کھِلیں 

سب موسموں میں رُتوں میں 

گردشِ ماہ و سال میں 

ائے باد صبا

 یاد رہے۔۔۔!

اس کی تازگی برقرار رہے

------

ملک انس اعوان

مکمل تحریر >>>

جوتیوں کا سبق

سرخ رنگ کی نئی گاڑی جو سیاہ سڑک کو روندتے ہوئے جھیل کے کنارے کنارے بھاگی جا رہی تھی، دور دور پھیلے ہوئے پانی پہ سفید شفاف دھند اپنے پر کھولے ہوئے آسمان کی نیلاہٹ کو ڈھک رہی تھی، پچھلی سیٹ پہ ٹیک لگائے میں شیشے سے باہر کے مناظر دیکھ رہا تھا ، اگلی سیٹوں پہ براجمان افراد بھی چپ تھے ، کچھ دیر میں ایک صاحب پیچھے مڑ کے میری جانب دیکھتے ہیں، حسب عادت نہ تو میرے زبان سے کچھ الفاظ بر آمد ہوئے اور نہ ہی میں نے چند لمحوں کے لیے گاڑی رکنے کا کہا بلکہ اشارہ کیا کہ چلتے رہیے.گاڑی کی رفتار مزید تیز ہو گئی اور آہستہ آہستہ جھیل کو پیچھے چھوڑ تے ہوئے پہاڑوں کے درمیان بنی ہوئی اکلوتی سڑک پہ دوڑنے  لگی، سڑک کے ساتھ ہی  حد نگاہ بھی محدود ہونے لگی. اور مجھے قدرے آسانی اور  راحت محسوس ہونے لگی کیونکہ  اب بولنے والے منظر آنکھ سے اوجھل ہو چکے تھے،بس ایک ہی طرز کے، قریباً ایک ہی شکل کے پتھر تیزی  کے ساتھ آنکھوں کے سامنے سے گزر رہے تھے اس قدر تیز کے ان کو پہچاننا ممکن نہیں ہو پارہا تھا، بالکل زندگی کی رفتار کی طرح جہاں ہم وقت کے ہاتھوں مجبور ہو کر ٹھیک طریقےسے چہروں کو  دیکھ بھی نہیں پاتے ہیں،باتیں کہہ نہیں پاتے ہیں اور مواقع وقت کی رفتار میں بے طرح گنوا دیے جاتے ہیں . مگر جب مطلع صاف ہوتا ہے،  کھلے کھلے منظر نظر آتے ہیں، جب کچھ کہنے اور ٹھہرنے کے مواقع  وقت خود فراہم کرتا ہے تو وہاں سے بھاگ جانے اور کہیں دور چلے جانے کو دل چاہتا ہے .
زندگی کے بے ثبات پنجرے میں یوں جان اٹک جاتی ہے کہ کھلی فضا میں بھی دم گھٹنے لگتا ہے.
سوچتے سوچتے وقت کا اندازہ بھی نہیں ہو پاتا. لوگوں کی دنیا میں واپس آتا ہوں تو گاڑی ایک چھوٹی سے مسجد کے سامنے نماز کے لیے رک چکی تھی.بظاہر تو شام کی تاریکی پھیل چکی تھی مگر میرے اندر امید کا چاند  ایک بار پھر طلوع ہو چکا تھا.
وہ جو مالک کُل کائنات ہے، اس نے کچھ تو طے کر ہی رکھا ہو گا....... بس یہی سوچ کہ نماز ادا کی، اور مسجد کے صحن میں باقی صاحبان کا انتظار کرنے لگا .مسجد کی سیڑھیوں پہ کوئی ہمارے آنے سے پہلے ہی ہماری جوتیاں سیدھی کر کے جا چکا تھا. اور جاتے ہوئے ہم بھی وہاں بعد میں آنے والوں کی جوتیاں سیدھی کر کے وہاں سے اس امید پہ روانہ ہو گئے کہ یہ سلسلہ اب جاری رہے گا.
اس ایک مغرب کی نماز کے بعد کئی سوالات حل ہو چکے تھے.

ملک انس اعوان
11 دسمبر 2016
بمقام: سرحد صوبہ پنجاب و خیبر پختون خواہ،

مکمل تحریر >>>

مرتے ہوئے امکان

نہ مروت نہ تعجب نہ تکلف نہ بیان

لحظہ لحظہ ابھرتے ہوئے مرتے ہوئے امکان 

روح و ہستی میں اترتے ہوئے خاریدہ گلفام 

گھبراتے ہوئے کتراتے ہوئے دشمن بدنام 

اب مجھے موج تبسم میں  رواں دیکھیں گے

حال و ماضی کے تصور سے نہاں دیکھیں گے

ملک انس اعوان 

مکمل تحریر >>>